最緊要夠Chok

最近興講Chok，其實兩三年前在大學已經很流行用這個字。當年我幫朋友影莊相畢業相，個個 chok到爆，我最記得李書權那張歷史系會長的個人照，有朋友說，影出來與真人完全兩回事。

Chok，加上攝影技巧，絕對有化學作用，有吸收精華聚集元氣之妙。

其實我本人也相當Chok，這是一位師傅教落的。男人，可以唔靚仔，但唔可以無自信。行得出條街，就一定要有自信，要夠不可一世，要夠型，要以為自己係與別不同、世界第一、所有人的視線都會投射到自己身上、被我看一眼的人都會被電倒一樣。

師傅向我說：「係好攰架，攰咪番屋企訓囉，總知落到街，就當條街係你嘅。」他舉了一個最Chok的例子，讓我參考：謝霆鋒。

無論任何時候，不論幕前幕後，明影或被偷拍，只要在屋企以外的地方，謝霆鋒都保持一副Chok到暈的臉孔，就算反白眼口吐白泡，都要Chok住吐。「你估謝霆鋒係咪真係咁Chok吖？梗係唔係啦，佢打機個樣咪又同普通男人一樣挈大個口得個窿，會唔會對住Winning入面的球員Chok樣吖？嗱，呢啲就係神級，總知一露面，出門口搭lift都Chok住搭，咁就包你有吸引力。」師傅說。聽起來像寶藥黨，但我不用付出金錢，只要花點精神，值得一試。

Chok的日子有功，連自己也被洗腦，本身樣子頹頹貢出街也會變得精神奕奕，連阿婆都會被自已迷倒。走在銅鑼灣的街頭上，單眼皮的我頓Chok成雙眼皮，明明看得清楚又要朦起雙眼看東西、扮高，腰背挺直、挺胸收腹，走路時腋下不貼著手臂，儼如劉德華式走路、無故用手指抺咀角。

而Chok的作用只有一個：吸引陌生人目光，尤其是異性。師傅又再指點：「最高境界的Chok，是當你在扮cool時，一邊以雙眼電人，一邊看看對方的反應。如對方作出回望，在眼神交流之際，不要尖縮，不必躲避，但不要『睥』實對方。『睥』實會令人覺得你是以咸濕的目光去窺賞對方，相反，你應該在眼神交流的一剎那，報以輕輕的微笑和點頭。」師傅要我記住，不論對方是青春少艾還是老邁人妻，都要如此做。「這不單能練習你與陌生人搭訕的勇氣，更能訓練你在任何場合與任何人，不論男女，打開溝通之門。」

雖然聽起來有點誇張，不過我的確認為自信是很重要。自信，就是打開溝通之門的關鍵。