秋季大特賣、惠康聖誕大特賣,陸續上市,作為消費者,乍見買一送一,即入鋪巡視業務。
原來沒看清楚細字。買一送一,買一送半,第二件半價,八折再九折,引客入店先算,全場只有一件貨品買一送一。送的還是要同款。
甚麼是買一送半?我忍不住想問售貨員,但我相信她正在向另一位客人解釋同一個疑問。最後我發現,其實即是買二送一,或送價值一半的貨品。但所謂價值一半的貨品,可能是一個八達通套,或是一條電話繩。這些貨品的一半價值是一百元?是的,他們主場,說甚麼就甚麼。其實是變相迫人買二送一。
記得早幾年有專定教路,正價貨的七折,對消費者來說是最抵的,原因是七折大約是零售商的來貨價。我做零售商,如果明知七折是來貨價,那我做什麼生意?但折是要打的,因為要宣傳,因為要應節,你精我靈,我在打折時將原價推高,在推高價後的七折,就比來貨價要高。客人見有折,一定會來睇睇,鬼記得那個價是高了還是低了?有幾多客會日日來打價?
香鎮的團購網也是如此。只要冷靜一點,先在網上查一下外面的零售價,不難發現,產品類的團購,幾乎沒有特價可言。例如,我查過一部電視的售價,與團購網的「特價」是一樣的,只是經團購網,會送一條HDMI線,聲稱值兩百元。不過,睇埋下面其他類別,就知道經團購網購物,所得到的是甚麼。
服務類、戲飛、飲食的確會便宜一點,戲飛只要平過三十五元便要蝕本,而飲食業的定價,又是餐廳自行定的。朋友試過經團購網到上鎮的餐廳食平餐,入到餐廳後,大廳空無一人,但被安排到的小區卻是坐無虛席。
「請問可唔可以坐大廳?個廳都無人」友人問。
「唔可以」
「點解?都無人,坐得鬆動D唔好咩?」
「先生請問你係咪用XXXXPON?」
「係呀」
「麻煩你呢邊啦」
原來,朋友被安排到「G區」,即XXXXPON區,這區的人全用團購優惠的。用餐過程當然不甚愉快,亦無待應理會。友人即時笑了,「肯定個老細劃出呢個區,叫『契弟區』,就係呢班契弟,cheap到震用團購飛,唔理你!」
為何老細會如此憤怒?試諗諗,一個平日賣$200的餐,要賣$98,原來老細賺$102+的,依家$102去左邊?有朋友參加過團購賣野,在優惠以外還要付一大大大筆錢買database,老細會唔會好開心呢?