三月再會

我很累。三月再會。

土語

每個地方都有自己的土語，其實即係英文的slang，我在廣州也學了不少，最好用的都是「撈」。

撈，讀音同英文的Lau一樣。成日比人話，乜你咁撈呀，做D野咁撈，死撈佬，諗極都唔明，班同事又好齊心咁唔講比我聽，最終我靠零食攻勢，先問到簡釋。

「即係你地D香港人，統稱我地係大陸哩一樣，我地南方人，叫北方人做撈，主要係東北方。」哦，所以我成日話去食的蘭州拉麵，佢地話我「食撈野」，話我似撈佬咁解。

撈字帶貶義。雖然南方人以前被稱為南蠻，但原來大部份南方人都覺得北方人很野蠻，落香港搞事的都是撈佬撈婆，廣東人落香港玩係會好D。其實我都認同。在香港搞事的，都係重口味普通話口音的人。

廣州都係大陸，但比其他地方文明多，就講排隊。我成日在東站比人打尖，然後我就會屌人，比我屌的都係條脷痴實哂的撈佬撈婆。佢地應該在廣東省生活，識聽廣東話，但唔多識講。做的事的確野蠻，就連廣州本土的人都睇佢地唔順眼，覺得來搞事的都是撈，就好似我地打哂一船大陸人一樣。

撈亦都可以話人地落後，唔夠潮，做污糟，麻甩，無禮貌，7，等等，總知就唔係好野。我覺得似英文的nerd，不過我唔知nerd有無分地域性，但總知比人話都唔係好事，當然如果係比朋友笑，就無所謂。

經常講每個地方都有自己的文化，其實外來人真係好難去完全認識一個地方的文化，除非真係好花時間好花心機去認識學習。最近有人些白痴撈想認識廣州文化，但每星期都只係來一兩野，9up一番就話要帶起本地文化等等，齋up唔做又有錢收，真係筍到震。

要學人家文化係要花時間花心機的，土語係入門。

靈感

書看得慢了很多，寫作的速度也因局限的觀察而減慢了，每天回家，磨下磨下又眼睏了，想寫文章的時候，就是睡覺的時候，於是經常出現寫寫下訓著的情況，或者透過意志反擊睡意，在昏昏欲睡卻未有睡著的情況下，手指反而有力不停打柒鍵盤。

有時腦鈍了，轉慢了，記不清楚某個題材是自己寫過的，還是自己想過要寫，但最終忘記了題目。經常浪費了不少寫作的材料，尤其在街上，像吃即食麵一樣，吃完便算。唯有隨身帶備簿仔與筆，一有機會便將所想到的題材、關鍵字、甚至整篇文章寫出來。有時會口up up慢慢讀出自己所想的，也有時一起筆便停不了。

以往靠看書和工作所需留意身邊事物的基本需要而想到題材，獲取靈感，最近則多與朋友溝通交流，新朋友也好，老朋友也好，不停聽，不停想。當然，我主要聽人說話比較多（我有位朋友好多野講，無一分鐘停的）。最近也多聽歌，睇每首歌的歌詞和背後的含意，再睇埋MV，留意拍攝手法，影片相帶出的message，甚至估背後寫稿那條友諗緊咩。

度橋真係要多靠觀察，以前有個師弟，入左4A做廣告，同我講：「其實入面班友唔係好勁，個個都話自己去睇藝術展，睇咩書去取靈感。之後問佢睇完之後有咩得著，係答唔出GA，只係留底一句：『嗯，幾好的，幾好的』。」我無去求證，到底條友係比4A的人昆佢丫，定係那裡的人真的無咩料子，但師弟令我覺得，要取靈感，不論用來寫野，還係諗盤生意點run，觀察力好緊要。

所以我經常保持觀察，小至對方隻錶、皮帶，大至公司各人的公職，無聊至坐火車時估旁邊條友做咩工作。

不舉

有朋友同我講，佢朋友的老婆好唔鍾意佢，所以成日都唔番屋企，日積月累搞到佢「唔得」。「佢睇左好多個醫生，都話佢無事，問佢係咪婚姻生活唔美滿，佢就講出，佢地一年前結婚，係相睇的，老婆其實唔鍾意佢，所以成日唔返屋企。點知個老公半年前發現自己『唔得』，出外尋醫都唔掂，話係心班問題。佢同老婆講：『你番來啦，我唔想搵第二個女人試。』」

原來心理真係好勁。聽過好多奇聞，又話意志可以醫好癌症，又話可以在極地生存到好耐之類的，但原來心理問題都真係會令人不舉。強國周圍都係男士泌尿科問題的廣告，搞到我以為班強國男真係東亞病夫。其實我都唔知到底那些泌尿廣告是真是假，亦唔想去證實，反而我想知，呢個年代仲盲婚啞嫁，係咪會影響心理呢？心理醫生係咪應該有多D廣告呢？

其實自古以來，很多大贏家都識玩心理，不論在賭桌上，還是在戰場上。空城計，是心理戰。借東風，是捉心理。Bluff，是賭心理。心理質素好重要，落場經驗係令心理質素指標增加的原素。所以唔落場，心理差，就會不舉。那就輸了。

記得古天樂同鄭秀文套戀上你的床，都係講不舉，另一主角劉青雲教古天樂練功大法，希望佢能舉得。原來除此之外，靠食野都得。三個男人在廣州，其實成日講泌尿問題，有朋友話，食大蔥，蒜，芥菜等，都係對男人好的。

講番套戲，係講古天樂因為試過比粒子彈擦過古仔，成日以為自己比個賊打中，搞到舉唔起，最終要親手射番個賊先舉得起，又係心理。

所以我覺得，除左食野，練功，最緊要心理，仲要久唔久落場。

相同意思，不同意義

有些字詞，聽落好似意思相同，但事實上有不同的意義。以下為例。

做愛和扑野。Make Love 和 Fuck。

做愛（Make Love），照字面解，就係我愛你講到口都軟，已經唔足夠表達我對你的愛，所以要以行動表示，做出來。做愛一定要和愛人做，才叫做愛。做愛者雙方已不在乎對方的技巧，只在乎二人之間的愛的交媾，就算只有一兩款動作都無所謂，因為愛已比任何東西都要大。

叫雞或者找sex partner，不是做愛，是扑野。扑野（Fuck），係Fornication Under Consent of King，中譯為「在國王批准下可以交合」。這是古代的規定。如果交合要在國王批准下才可進行，那這種交合未必是來自愛。沒有愛但互相透過性器官去解決對方的慾火，就係扑野。扑野無愛的，由於無愛，所以扑野技巧顯得相對重要，技巧去決定對方的表現。

所以，情人節最好去做愛，不要扑野。但其實情人節唔一定要做咁多野，只要在你最愛的身邊，已經足夠。

__________________________________________________________________________

好撚仆街和好撚閪。

我地成日會鬧人：呢條友好撚仆街，或者，呢條友好撚閪，聽落好相似，但其實有分別。

鬧人仆街其實係覺得條友做野有點壞，但壞得來又有點抵死和啜核，有時甚至其實內心係有點認同對方所做的事。鬧人仆街，就算真係最貶義都好，其實都仲留有點餘地。但如果鬧人好撚閪的話，即係話條友做的野，既損人又不利己，或者令到人雞毛鴨血，賤到出汁之類。就算係笑住咁鬧人閪，好多時心入面已經對對方起了戒心，與對方有任何接觸甚至要考慮到會否對日後做其他事有影響。心入面其實有一股狠勁，想窩一窩條友。

道義問題

試過有位警務處的唔知乜高級官到大學講talk，有條學生會的友仔又以為自己好撚型咁問人，能否承諾在任期內趕絕黑社會？

問題一出全場嘩然，我心內坦誠的送了一句「on9」給那位陳姓的契弟。

我並非助長地下活動或支持三合會，但我只想問陳姓學友，三合會做錯乜野，要趕絕佢地？

黃，賭，毒。這三項危害社會和影響年輕人的東西，是嗎？

那影響社會安定繁榮的，又只有這三樣嗎？

仆街，那些銷售基金和叫人借錢的，又是不是正在危害社會？我個個星期都收到匯豐寄來叫我借錢的單張，又收到很多財務公司叫我借錢，如果我係後生仔我比佢導左我去借錢，我咪要去搵快錢去還錢？

陳on9發問時，雷曼未爆，賣高風險產品的sales話就話會提班買家，風險的存在。即係等於，我要去搵快錢，大佬同我講，我會痛ga咁解，講左係咪等於無講？簽左文件就等於一切？

在香港讀大學的，很多人都選將來搵錢最多的finance，媽的，入到行做的野，咪又係靠搞基金呀，M&A呀之類的錢搵錢，又或者炒炒賣賣，幫人搞IPO也好乜q都好，過程咪又係去令一班唔係professional的人去相信自己，然後從中搵錢。

三合會做的生意，起碼唔會氹細路氹阿婆。金融界幾多大鱷，搵嘅就係阿婆錢，搵完之後仲話：「佢貪心姐，唔係點會咁」。人貪係一回事，氹無知婦孺又另一回事。我中五就比個東亞賣基金的友，氹我月供基金，當時我講到明收入都唔穩定，仲要月供？佢仲氹我話「都十六歲啦，可以自己學下用自己的錢麻，唔洗下下問阿媽。」屌你老味啦，十六歲小朋友你都氹。

我做左幾十年人，就真係未有人試過氹我黃賭毒，但氹我買金融產品的就有好多囉。咁，

陳on9，你不如問下，警官幾時杜絕大鱷丫。

習慣

我在異地很易習慣。不論是任何地方，說任何語言，任何氣候，只要我逗留三天或以上，我已經習慣。

例如美國，例如廣州，例如台灣，例如澳洲，例如日本。

每次到埗總有人做東，帶我四處走，但通常在許可的情況下，我較喜歡自己走走。我最喜歡用最原始的方法在當地做最平民的事。我不喜歡旅遊區，所以甚少到旅遊區觀光；我會夜晚出擊搵架步。不是色情架步，而是吃和玩的架步。夜晚出動的人通常最知道邊度有得玩和有咩玩，邊度食檔最多人去，通常美食都係半夜三更先開。

去到廣州，我未去過夜場，但已經聽過哂夜場的名，和有咩特點。邊度食野，食咩野，好味的原因和餐廳的故事（如有），我都記得哂。呢D記憶力，在我中學時代都發揮唔到，所以會考仆哂街，證明每個人都在特定的題材上有特殊的記憶力，只係對唔對口而已。

講番食買玩，去到日本，我又唔知點解，一句日文都唔識，都可以問到路，又去到山頭火，當時香港仲未有，香港人都唔識，我係問個日本仔問番來的。又或者在台灣，去只有的士佬和艋舺才會去的林東芳，我同台灣仔講去過林東芳，佢都會問我點解會識去？

記得在台灣，我一條友夜晚兩點幾在大大小小的街巷閒逛，夜晚認下路，一晚已經熟左台北東區的大街小巷。我很喜歡這種習慣，習慣去很易習慣一個地方，並不容易。心要夠靜，無欲求，可能放下一切，去投入旅程或新生活。否則正如在我FACEBOOK見到不少朋友，去旅行期間日日擺相上網，去到有WIFI的地方就WHATSAPP。

這也是習慣，習慣了將靈魂寄存在虛擬空間，所謂的Cloud。

踎廁

大國的廁所有個傳統，就係總有踎廁。細個唔識，覺得踎廁好肉酸，點解屙屎要踎住屙，我由細到大都係坐住屙的，踎住又要出力，又攰，到底有無sense嫁！

但我錯了。現在的我愛上踎廁。踎廁的洗潔度，肯定比座廁好。我曾說過，我對廁所和馬桶的要求，同揀老婆無分別，所以好多馬桶對我來說，都唔合格。但如果有一個馬桶一個踎廁，如果個馬桶有少少污漕，我都會揀踎廁。

一個乾淨的踎廁，其實係會令人屙得更順暢更快捷和更乾淨。踎住屙的確會令大腿小腿都累，但令條腸因地心吸力和肌肉擴張而令屎眼變大，物理加上生物學，個窿大左，屙出的機會自然大左。而我去過幾次很大的大便，次次都沖得乾淨，可能同踎廁斜斜地的設計有關。

又試想一個馬桶，唔夠力沖水，堆大便總依戀在馬桶之內，是何其肉酸。小時候學的公德心，一定唔會在馬桶面前盡力忘記，最好就逃之夭夭。令人家不悅是後話，令自己污糟先係罪過。我們永遠不知道，大便到底什麼時候是一條，什麼時候是一小粒，什麼時候是一大顆的。如果一大顆的話，真係仆街。通常屙一大顆的時候，都要很用力，而當用力去屙時但大便的長度不夠，便如一支手槍發射子彈一樣，嘭嘭嘭！

仆街，目標不是什麼，是水！當大顆大便撞到水面，水面便會激起浪花，甚至白頭浪，如果水面的位置與屁股相近還好，起碼衝程短，廁所水有機會只湧到馬桶周邊。如果是高身設計的馬桶，那就仆哂街了。DOUP！一聲！成堆廁所水彈上屁股，認真屎忽開花。

如果粒大顆大便，唔係第一舊，面係第七舊，試諗下屁股上的水……

HKG

那次我行出門口，一班死飛仔拎住把刀迎面而來，嚇得我都唔知好唔好繼續行！

301 個阿叔好醒GA，當時已經識租麻將比人打，賺好多外快GA。

係呀，佢無讀過書，但仔女一門四傑，英國司機呀（係英、國、思、基），全部入哂大學，最水皮果個都入到理工。

我都唔明，老豆一個人點可以將個吊櫃，由4樓搬落2樓，之後仲可以搬埋上上格床。喂，老豆，你唔好彩丫，如果有得讀書，你肯定係建築師、工程師、室內設計師。

家姐，我靚唔靚呀？靚唔靚JET？（係個男仔問）我落荃灣玩呀，今晚夜D番，我唔帶鎖匙啦。

記唔記得你細個，成日話想落個球埸玩？我死都唔比你落去。下面好多飛仔，真係好似以前拍古惑仔咁，個個唔係帶波去球場GA，係帶玻……璃樽去GA。

依家班友仔要專登飛去北海道，仲要比百幾二百蚊去玩滑草，我地一塊紙皮就o係後山的草坡滑落去啦，要比錢GA咩？

每次團年，六兄弟姊姊總會你一言我一語，細說以前的往事。我最喜歡聽，因為太多現在意想不到的小故事，通常都圍繞著他們以前住的二樓和四樓、走廊、樓下的球場、士多、粥鋪、細路仔爭住玩的乒乓波台。

團年和新年就有這樣的氣氛，以前仲可以在樓下燒爆仗，十二點幾一點仲走來走去，叫隔離屋的細路仔一齊玩，玩累了就一起食年糕，蘿蔔糕。長大後可能再無與鄰居聯絡，但細個時候一齊玩的記憶依然在腦海中，每年recall一下。而元宵節，不論有無拍拖都好，雖然不會特別慶祝，但家裡總有湯丸等著。就算家裡食哂，總會有陳師奶或李生留著一點。

這才是香港。

元宵節快樂。

足球迷

自九O年世界杯起，我就好鍾意睇波，當時鍾意意大利同德國，有馬圖斯、奇連士文等，仲好似有巴治奧的。那時未興睇球會，所以一等要等四年。呢四年值得等，因為一等，就等左我的一生最愛。

巴西。

那一屆，羅馬尼奧同白必圖組成「夢幻組合」，一晚巴西對荷蘭，唔記得邊個入波之後，夢幻組合與隊友在場邊跳舞，姿勢係作抱BB狀，係我印象最深刻的一個慶祝入球的動作。最後因為太眼訓無睇哂場波，到我訓醒時係比當時得兩歲，喺我隔離賴屎的表妹仔臭醒。可能係呢個原因，我就記實巴西。

九八世界杯，朗拿度領軍，賽前我已經好撚鍾意朗拿度。細個唔識，無買佢波衫，但阿姨知我鍾意，在去歐洲旅行時，買了一頂印有巴塞九號朗拿度的名字的鴨舌帽給我，那時我認識了他踢的球隊，叫巴塞隆拿。鴨舌帽仍在，最近拿出來看，雖然是很柒的，但如果能夠戴著它到巴塞看球賽，我覺得係好有型的事。

巴塞隆拿。

同我講開波的朋友都知，我唔會特別鍾意一隊波，因為球員會轉來轉去，可能有我唔鍾意的仆街在隊中，不論籃球足球都係。但我發現，原來自己一直暗啞底有心水球隊，巴塞係其中一個例子。如果有人話，屌，你見近年巴塞係地上最強自鍾意之嘛，世俗，那就真的要SORRY了。

我在衣櫃再找，見到一件印有十號利華度的巴塞波衫，年份不詳，係朋友幫我在當地買的。利華度係朗拿度的最佳戰友，與朗拿甸奴在零二世界杯組成3R，兄弟幫捧走世界杯，三個都踢過巴塞，那我有咩理由唔支持巴塞？

講到尾，其實我都係支持球員多過球隊，依家我對巴塞的熱情減卻，但對朗拿度的往史依然回味。最近大陸的體育雜誌出左本好厚的朗拿度回憶錄，有好多好珍貴的相片，就算他到後來肥過隻豬都好，佢依家係那個無人能阻的朗拿度。

籃球迷

男人係好撚鍾意波，呢樣野係無法改變的永恆定率，而且越大越好。足球與籃球係世界上最多人睇的運動之一，起碼多過乒乓波同高爾夫波。

中一仲未識打籃球的我，係比班同學感染，開始睇NBA和打NBA Live，仲有儲過下籃球卡。當時接觸嘅一班球星，只係識佐敦、柏賓、洛文、披頓、penny等。而亞視播的NBA地帶，真係令我大開眼界，講波佬徐家諾幫班球員改的花名，的確係令我增廣見聞，識得更多球員。

鬼見愁，小飛俠，郵差，廢柴，澳洲牛等等。

好撚好笑，但又真係學到野，呢D咪勁囉。講到最鍾意的球員，其實真係佐敦旺角油麻地。我知係好爛，但真係好好笑。

由於我唔太識打籃球，只係識入樽，所以佐敦永遠唔係我模仿對象，只有我係佢的模仿對象。

我學的反而係洛文。由於我自細都大大舊，其他同學都唔夠我搶籃板，我唯有被迫打中鋒。「喂，邊有中鋒咁撚矮GA？」我問。「得啦，係睇戴維斯都係六呎九之麻，要同七呎的人打。你有中鋒咁大隻就得啦。」一個明「濕」我的仆街說的。那個仆街自稱是意大利木村拓哉。你認啦！你認就係你啦仆街仔。

於是就被定型打中鋒。

由於身型太矮，進攻有難度，唯有靠防守。不斷跟洛文學搶籃球，加埋奧尼爾的大塊頭式衝撞，我成功令校內六呎的幾個巨人屈服我腳下，籃底下根本就係我天下。

就算後來去到美國，同班黑鬼打波，我終於可以打番出面，但依然有走去籃底下防守的習慣。又唔係話好勁，成勁block過幾個黑鬼，同埋喺幾個六呎以上的白鬼身上搶籃板姐。

姚明

早陣子奧尼奧不斷捧姚明入NBA名人堂，姚明以一貫國人作風，謙卑地婉拒。其實姚明當之無愧。

就算姚明已經宣佈退休，但我回大陸做野的幾個月內，周圍都見到姚明的影子，有電視廣告，也有平面廣告。這當然是和他本人有關之餘，也跟他與國人之間的關係有關。

早幾十年前，大國內流行打波唔流行睇波，所以很多時候只會播放明星賽，普通常規賽並沒有播放價值，就算第一位國手王洽郅的出現，都沒有令國人突然對籃球有熱血澎湃的衝動。直至03年姚明出現，以狀元姿態加入火箭，由唔識英文到幾乎可以在鏡頭面前rap，為國人在花旗國插旗打下最強的強心針。

呢支強心針，成份包括：國人是努力的人，我由過江龍都可以變成地頭虫；休士頓和火箭已與姚明和中國掛勾，好多人都唔記得，曾帶領火箭贏過兩屆冠軍的奧拉祖雲；我在國際間係可以有影響力的，甚至是可以靠體育賺錢的，唔係淨係識打乒乓波和做體操。

最重要係影響力。

邊個係高比？加納特？甚至現在的路斯，杜蘭特？國人識哂佢地，都係因為姚明。姚明打波，令大國播多好多埸NBA，有時甚至直播。就算姚明有時狀態唔好，但都起碼睇到佢嘅對手有幾勁。嘩，呢條友可以喺姚明面前入樽，邊個來的？就算鍾唔鍾意佢都好，都會睇一睇佢係乜水。

我都睇左好多場姚明，其實真係辛苦左佢，每埸都變成對手的目標：「只要我在你面對入波，就有人睇到」。任何人都會這樣想，當年iverson在jordan面前插花，也一舉成名，這就是皇道。

姚明，你絕對值得入名人堂的，因為你為NBA和為國人帶來生意和娛樂，在埸上入波與否都唔重要，最重要是你的影響力。