曱甴

做曱甴都要做得聰明，我覺得不少曱甴都好聰明，但有好多都好撚蠢。

曱甴明知自己細粒，好易比人踩死，為求生存，加上野心勃勃，於是唯有做地下霸王，躲在地下水道等永不見天日，亦幾乎無機會有人行的地方，以防比人踩死。

呢類係好聰明的曱甴。佢地明知自己無得揀，做左曱甴，唯有適者生存，去一個自己唔單止生存到，仲有機會做王者的地方，繼續發市，旗下曱甴千萬，隨時勁過地上任何一支軍隊。

而我亦都見過一些很蠢的曱甴。係我在坐火車番廣州，上月台之前的通道上見到。

白痴仔，和諧號十分鐘一班，個候車室每分鐘都過百人，行去月台的走廊幾乎係每一分鐘都一定有人行過，我見曱甴哥仲夠膽死在走廊上走來走去，心諗，你死撚梗。

點知個撚字只係發到個la音，就已經聽到啪的一聲，一位拖著行李的強國女人像盲頭烏蠅一樣抬頭四圍望，睇緊係邊個月台上車，我諗佢到底係腳底定車轆輾過曱甴哥都唔知，甚至感覺唔到。

曱甴哥大剌剌地死在和諧的走廊。對於曱甴哥的世界來說，這事一點都不和諧。這叫做蠢。以細小的身型在最多巨人的地方走來走去，只有人會問你「係咪想死」，甚至連問都唔會問。蠢唔緊要，但死蠢真係無得救。係你都唔好揀強國的和諧號丫，仲要係春運期間，無一億都幾千萬人，死亡機會咁高仲來，正一死蠢。

講到尾，其實我覺得世界上有兩樣野都好無用，第一就係曱甴，第二就係塵。朋友話到末日我地死哂時，曱甴就會食哂我地，類似滋潤番個地球。但依家曱甴對我肯定無用，塵埃都係，奇奇怪怪的。

拜年

新年總會同不同的親友拜年，小時候會先到親戚的家，之後到父母朋友的家，逗的利是都是來自「大人」們，小朋友自成一角去玩。過去幾年都沒有到父母朋友的家拜年，轉為到朋友的家或中學老師的家拜年，向朋友的父母逗利是。

這兩年多了以前是一起出擊逗利是的，現在是向他們逗利是的朋友，他們自此成為「大人」。

而這兩年同時多了的，是以短訊收到恭賀的訊息。由於whatsapp免費，訊息可以水蛇春咁長，整條龍出來的，或者由初一祝到十五的都有，總知收到手軟。

但已經沒有人會打電話來專程說一句恭喜發財。

大約十年前，不論是新曆倒數或是行年宵，總知新年由正點開始，電話就開始打唔通，正月初幾都總是接電話無停，對於電話中的每位來電者，都會tailor made一段恭賀說話。現在科技發達，電話永遠打得通，反而係短訊發唔到、收唔到。而短訊的恭賀說話，也只是copy and paste。

每逢新年或某幾位朋友生日之類的大日子，我都喜歡先打個電話去講幾句，如果無人聽，又或者我身在海外，才會發短訊。當然，我也多用了短訊祝賀不同的朋友，但我總會tailor made一下，因為，我感覺到如果我收到的是一個疑似是copy and paste或手機default message的短訊時，我會覺得很他媽的老味。

可能我們都怕了有時要打幾次電話比對方，才說到原整想講的事，怕對方要接三次電話，是為對方著想。如果說話要分段說才能完成句子，那我們說話就已經變了發免費短訊一樣，一句話分三次send。

所以我依家成日聽唔明人家在說什麼鬼話。

藉口

特別喜歡周杰倫的藉口，因為我曾經係一個好多藉口的人。其實我知道，所有人都會因很多不同的事而有不同的藉口，但因為我比人話過我好多藉口，甚至叫我唔好咁多藉口，所以我好好記住。

在舊公司工作，效率好緊要，做唔到一件事，最重要唔係諗到底發生咩事，而係要盡快諗下點補救和仲有咩可以做。我習慣左每做一件事都有解釋，因為我覺得，解釋係話番比人知，為何會有如此決定，下此決定是基於什麼原因。但依家我已經被訓練到，視這些解釋為藉口。

如果是已成定局，無法做任何補償的事實，那甚麼理由和解釋和藉口都無用。如果未成氣候，仲有彎轉的，那就請立刻處理，事不宜遲，唔好浪費時間去諗藉口和解釋。當事情最終處理好，那就等於已成定局。

這是無械可擊的。

當然，有時在沒事幹的時候，或與朋友聚聚，都會想聽聽對方的解釋和藉口，趁機會入佢，寸佢一番。有時藉口也是令人增加溝通和加重氣氛的重要原素。

請再給我一個理由，說你不愛我。

這是一個安慰自己的做法，一個女的既然不愛了，幾乎就等於沒轉彎的餘地，只有傻呼呼的小子才會想聽聽理由。聽完之後又說你這是藉口，不接受你的藉口，解釋等於掩飾，你根本就不愛我了。

是啊，她都不愛你了，已成定局，要聽理由來幹嗎？藉口有甚麼用？都是藉口罷。

乜撚野工職

做野就做野，世界上有很多不同的專業。雖然沒有「搞屎棍」這個專業，但在每個專業上都有很多人搞屎棍。都不知是什麼位置來的，總知就係對事情無幫助的。

好撚奇怪，唔知點解去做野，總有辦公室政治，總有人搞事。仆街，公司請人回來是搞屎棍的，到底這會是一家什麼公司？到底這些撚樣的職位是什麼？

好多騎呢人喜歡請騎呢的人做騎呢的事，例如高薪厚職但無野做，亦唔做野。當無野做時，為了表現自己的價值，就要搵野做。但事實上自己料又唔夠，咪唯有搞屎棍。搞屎棍有幾難？靠把口得啦！收幾皮野，齋talk。屌你吖！我請黃子華來講楝篤笑唔好？你以自己係Steve Jobs？講句野就好有power？

無料的人為求發財，唯有靠廢up，靠旁門左道，以勁過渦輪的槓桿去吹水，踩低人地抬高自己，而做野好似牛熊證咁，隨時打把。最仆街係將做野的人一一打把，因為做野的人，可能會拖低自己發財的速度。

這類人真的很廢，更多的是，以為自己做過少少大野，甚至只是接觸過某個行業，就講到自己係專家咁款。屌，在我面對扮野，等於將自己的底牌比我睇，最多一拍兩散，我又唔恨錢的，因為我本身都無，亦唔恨要好多，但對方可能本身可以有好多，點知無哂，咁就真係幫你唔到。

我總覺得，靠耍手段搵錢的人，錢唔可以享得好耐，甚至成人被打把的對象（以前都寫過類似的人）。相反，做野的人總會比較充實，錢好可能無耍手段的人多，但起碼對得住人，見得到光。

我做慣大正派的，對反派有十級厭惡，對銅臭的人更感到噁心。

喂，搞屎棍的，我認真起來，連自己都驚。

Beat LA!!!

終於等到你了快艇！是的，我說的是NBA球隊洛杉磯快艇。講起洛杉磯，從來只有人提起湖人與高比，快艇成立以來一直被同市的強隊鎮住，頂多入過一兩次季後賽，但較多的，是一般人心目中魚腩的形象。就算我玩NBA98，我都專登用快艇去打季後賽贏埋總冠軍，仲對住班同學笑：「哈哈，快艇都贏到呀，頂你！」

最新一期中國版Sport Illustrated的封面，是格里芬。紅色面，代表快艇。一句口號：Beat L.A.!!!

一直以來，只有湖人才能「擁有」這句口號，可以擁有這句口號，代表有能力成為眾人之敵。但今日，Beat L.A.這句，來到快艇主場。未必每隊球隊都認為快艇很有威脅，但快艇的火力，的確強很多倍。

格里芬，比立斯，基斯保羅。三巨頭再度橫行的年代，每隊都想有三巨頭，塞爾特人只贏過一年，之後變六星戰隊；湖人依舊以高比為首，與阿達斯和加素爾組班；熱火勁到無野好講；今年快艇的老中青戰隊，威力未必最頂級，但積落多年的霉氣，肯定會令軍心大震。

快艇，加油！以西岸決賽為目標！

傳統勁旅不少已經一沉不起，或者贏得一屆就收了皮，雖然我曾因為米高佐敦的離開而拋棄過公牛，但曾經擁有公牛書包的我，對紅白戰隊依然情有獨鍾。今年咸美頓加入公牛，戴歷羅斯幽了一個默：「咁我可以有多D助攻」，證明可幫輕羅斯的負擔。

我另外對雷霆也抱有很大的期望，過去幾星期雷霆和公牛back to back to back左幾場，場場贏哂，在一個緊密的賽程能夠連勝，過去未有邊幾隊做到。

今年我同樣係貼公牛對雷霆。

Apple's Marketing

聽講大國呢幾日開始賣iphone 4s，又有果粉又有黃牛，場面好墟冚。

apple 的marketing一向做得相當出色，但出色得我開始有點懷疑。每逢apple有新iphone推出，預定之類的數字總是以「破紀錄」的姿態推出。而apple又喜歡以每店每日賣500部之類的推銷手法，令買家覺得是限量限量，吊哂人癮。

香港的apple則每人可買5部，擺明車馬比你班粉腸拎去炒，出面抬高個價，專門店就梗係會最多人排隊。

成日話apple有幾好有幾authentic，以前就係，依家我覺得篤手指借勢推銷姐。

從來無人話過iphone 4s 係 for steve，我未見過官方有announcement，我又唔多信部4s會因為steve jobs死左而又可以破紀錄賣。破紀錄？我在香港同廣州的地鐵及公共地方，見多左好多人用android，有三星有HTC，iphone比我預期中少左好多。一邊每日收緊quota一邊話自己好多人買左，我真係好想知D機去哂邊？

香港細，無代表性，所以我睇法好井底？我觀察係，apple睇到香港人搶iphone搶得勁，加上好多人水貨運上大陸，呢度個demand其實係面向13億人。最近apple在香港開apple store，遲D在尖沙咀同又一城都會插旗，如果apple唔睇好呢個market，佢唔會在呢度開檔。

周圍都話有貨，但度度買都要附帶D垃圾，例如去百老匯買就要買部空氣清新機，一係就上台出機，下下簽年半，相反其他牌子無咁野綁住，而且款又多。相反，iphone由出第一代到依家，只係個底同個餡唔同左，正面無變過，認真有D悶，就算macbook或者imac都轉個樣，換過件衫，用家轉口味唔出奇。

雖然由iphone4轉iphone4s係睇唔出的，但市面上iphone用家睇落無多到，相反好多人用其他機款，iphone4s所謂的破紀錄數量，我好質疑。

作句

我同幾個朋友成日講廢話，有時傾盆生意的idea時，講講下會講左廢話，之後好突然又能夠一齊行入正題，再廢再正，idea越出越多。廢話多，金句自然多，就好似黎天王咁，講完都唔知講乜，又或者毫無意義的，總有一堆堆。

When Rocky was able to fight at 60, I should be able to swim at 27.

其實只係催促下自己要游下水，做番下運動，無啦啦又整句野，好懶型。

我從來唔媾女嘅，我只係製造一個平台比班女喺我面前發下情姐。

廢話中的極品，最鐘意自我認同感膨脹，以為自己威風八面，型過發哥，不費吹灰之力就有女LUM自己，是男人最鐘意的共同語言，同講自己條野同黑鬼一樣大一撚樣。

林寶我係買得起，但我本身已經太有型了，如果揸住出街，呢D咪叫型得滯囉！

真係好好笑，但自吹自擂其實真係好好玩，吹得太型又會太無聊，如果吹嘅程度係reachable的話，係一門學問，係一個好高深的技巧，唔係人人得。有些廢柴就係吹得太型，又唔衰得，比人一「篤」，爆左，柒左，咁就真係唔撚型lu。

七叔唔開心時真係好有型，但開心果時又做番自己個名咁嘅樣，做佢朋友真係好矛盾。

只係想讚下個朋友，其實都有可愛的一面，但總係要笑一笑佢，拉一拉倒佢，再扶番佢起身。很多所謂的朋友，都係唔玩得，在意比人寸，又或者腦入面無「如何應對比人寸」的意識功能。其實只係大家開心，互相寸下，代表大家有留意對方的柒事，反過來想，同時係睇緊對方有咩好。

點頭

同相熟的人，或後生一點的，或豪氣一點的人遇見，會頭向上一chok，打個招呼。同唔熟的人打招呼，頭會向下點一點。

我總覺得，對住讓我向上chok的人，如果遇見時要說話，第一句會係：「喂，點呀」，或者總會「喂」一下。讓我向下點頭的人，第一句說的是：「你好」。

而同朋友傾計，有時係朋友的朋友，唔多熟，話題亦不熱衷，對方說話時卻無故對著你說，然後有一個像問你「同唔同意」的表情時，有時又會報以微笑，然後點頭，又或者笑住搖頭。其實有咩意思？

係無意思的回答。對於搭唔到咀的對話，通常都會報以如此的表情以作回應。有時點頭的時候，其實甚至沒有聽清楚對方在說甚麼，但又不好意思敷衍了事。或者有時好累，又或者本來自己想講，但對方又要搶住講，自己被打斷話柄時，忍住忍住，唯有點下頭，胡亂地帶過就是。

最仆街係，對方講野唔好笑，又要好似懶好笑，又或者講啲我唔明的野又要扮明白，就唯有微笑點頭，裝作清楚明白。

有時點點下，我都覺得好無聊，但又好不自覺會做如此的動作，唔想無禮貌，但又想參與（其實有時真係唔想參與，不過對方「講笑」時又要有一下望一望自己，好似叫你回應：「喂，笑啦，仲唔笑？！」），呢個反射動作，其實只係顯示出，「我在埸呀，我有聽你講野呀」的身體語言。

屌，人的禮儀有時真係好on9。都唔想應你，點咩頭啫？都唔好笑，笑乜撚野啫？

忙到仆哂街

忙忙忙其實自私，呢句歌詞真係好有feel。忙，給自己一個藉口，不去管自己不想理會的事情。

工作的確忙到仆街，雖然話係兩邊幫忙，但只係做一方的工作，已經霸左我部份假期，以致假期只是在室外工作。轉個方法諗，有得忙好過無得忙，忙完之後真係有成績的話，我無所謂，但無意義地亂柒咁忙，我覺得就真係藉口。

在大陸搞類似超級巨聲的歌唱比賽，人地問我在大陸到底做乜，我真係唔識答。簡單地答，係做網站。「寫code？」除左寫code之外，基本上乜撚都關我事，連內容設計我都幫埋手，就好似做雜誌咁，寫文之餘要做埋影相排板管理制作等。

熟我的朋友，唔洗問我做乜勒，我知你地會明白的。

唔熟我的人，更加唔洗問我勒，因為我講完你地都唔知我做乜柒。

呢兩個答案勁正，將所有要回答的問題推得一乾二淨，其實唔係我唔想答，而係我依家將以往做記者的觀察本能，發揮在現有的工作上，令我無時無刻都在做緊野mode，有咩諗到就記低，有咩idea即時develop。所以，當你地問我問題時，我個腦其實又諗緊野。

好似好撚攰咁。但講真，我幾個老細可以同一時間進行幾個mode的工作，如果我係2GB Ram，佢地係8GB。如果我咁樣就係好撚攰，我真係會睇唔起自己的。

大家都知我以前係運動員，在香港來講唔係好勁，係當時游水人少，我先好似好快。但我由細到大都有個不服輸的心，在香港比其他教練寸我嗎？比其他泳員寸我嗎？我唔單止要嬴你一條街，我仲要喺外國帶個金牌回來塞住佢地把口。

我唔鍾意人地睇我唔起，但我更加唔鐘意睇唔起自己。所以我要好變態咁唔滿意自己的工作，才有更佳的作品。

黑店呃你錢，名店呃你尊嚴

D&G 話自己無意冒犯港人，但成日聽到身邊朋友講，入到該區的名店，只要你講廣東話，你都會受到冒犯。例如係，當我問個sales拎個袋來睇，sales會話，你唔好阻住我做野；又或者，我好想問人個銀包的價錢，但總係無人為我提供服務。

仆街啦，名店，乜撚野叫名店？

死物出名，生物臭名。

名店之所以名，係佢地的產品有design，有質素，甚至手做。名店內的服裝，甚至可以為客人Tailor made。能夠提供如此服務的商店，sales的服務態度很重要，因為sales並非只賣一件產品，而係提供一項服務，由服務令顧客購買產品。這已不再是一買一賣的一刻交易，而是雙方有較長時間的交流。

服裝皮具俱死物，其質素已有保證，但售賣這批死物的生物，即那班自稱沒有冒犯港人的撚樣，人文素質比件死物仲衰，仲要衰到自己人打自己人。

仆你個街，呢度香港呀，自己地頭鬼打鬼，你賺到D commission，洗得安樂咩？

旅遊協會搞D咩Q嘜優質商戶之類的，希望教曉遊客，唔好比黑店呃。其實有咩用？旅客也好，自己人也好，行街買野最想得到尊重，你唔尊重人，人地做咩要尊重你？學竊聽風雲二咁講句：「仲衰過D鬼佬」。

黑店呃你錢，名店呃你尊嚴。

咪以為只係得D&G一家仆街，成條廣東道都比班仆街搞到仆哂街，不如廣東道索性學通菜街咁，改個類似「女人街」的花名，叫「仆街」算啦。

最重要係，Dolce & Gabbana，你有幾撚名店呀？在我心目中，D&G，二級貨仔姐。