天長地久

鐵達時手錶的campaign，往往令人有意外驚喜。雖然所有廣告佬都會覺得自己的野好得，對家的野又乜又物，但我作為觀眾來睇，的確想追追這廣告。追追它的後繼和以前的版本。

其實最新的一個，內容並不突出，贏在夠Feel。懷舊的場面，新款的手錶，是香港人都認識的梅艷芳，一曲「似水流年」，幾句歌詞，令我打了一個冷靜。是令潛在的「那些年」爆出來。

一直以為只有鬼片才會配突然大聲的音樂，用來嚇人。但這廣告的「似水流年」突然爆發，效果一流。

上Youtube睇番發哥吳倩蓮版本，沒有對白的廣告，只有歌與畫，基本上連音樂都不用開，都足以明白整個故事，是廣告的極致。發哥型爆的空軍LOOK，廿年後看都不覺得OUT。最正的還是「我送你一只手錶。這手錶不簡單，後面刻的是天長地久四字。」有朋友後生時也收過女朋友這一隻錶，我相信當年的確大賣。以前哪有那麼多乜phone乜pad乜相機，能夠送一隻手錶給最愛，我朋友也相當感動。

天長地久的，是我們戀愛的時間。

我走了，手錶就是記住我們一起走過的日子最好的硬件。跟你一起的時間，是最值得留在錶中的。不在乎天長地久，只在乎曾經擁有。我不知道走了之後能否回來，但我們曾經有過的經歷，是不能改變的事實。

手錶總會有無電的一天，但時間卻是天長地久的事，我對你的愛卻是運行在這個時空之中。也許在另一個時空，我正牽著你的手，正幸福生活。但不要緊，雖然我要飛了，但我給你手錶，那是我們以後無限的時間。

僅止一次，也只有這一隻。

卻是永恆。

哥哥的魅力

自少覺得唱張國榮的歌，很土很娘氣，好女人型。直到長大了，才感到哥哥的魅力。在金枝玉葉和鎗王，到後來的異度空間，和重看多次的春光乍泄，阿飛正傳，都讓我感到，我正在看一位巨星演出。

一舉手，一投足，自然得像安排過一樣，阿飛正傳中的跳cha cha和梳頭，都像神來之筆，那種美態是連男人見到都會心動，想學佢跳舞梳頭的動作；而我，對住塊梳頭，只見到一個柒頭。

現在的所謂靚仔明星，sorry，真係收一收皮先。面對哥哥，這批混水摸魚，有殼無餡的帥哥們，睇睇哥哥，認真的拍戲，完全投入角色，發揮得淋漓盡致，令他就算只是摸一下琴鍵，都能夠成為焦點。

哥哥離開之後，令娛樂圈少了人才，但這令大家更懷念哥哥，更覺得巨星和靚仔的珍貴。

每年的愚人節，或心血來潮時，都會找哥哥的電影來看。王家衛用哥哥也是一絕，極致的巨星，配合極致的導演，絕對像一顆璀璨的星般閃著。阿飛正傳，其實係有劉華的，但統統都給哥哥搶過了。

而哥哥的歌也是現在的我唱K必唱。當年情，大熱。巨星的歌不必太複雜，幾句歌詞足夠表達千言萬語。雖然我覺得陳奕迅也是很有才華很星級的，但最近的歌很有意思得來，卻令人聽得很頭痛，咁多歌詞，表達咁多意思，我一餐飯真係唔可以食咁多野。

幾句簡單的歌詞，不停地重覆的旋律，卻百聽不厭，心想，怎麼3分34秒這麼快就過去。

真係好多攝影師

朋友不停在網上 post 自己的相片，全部都由「攝影師」操刀。朋友的相冊用XXX的相冊為名，引起我對那位XXX「攝影師」的好奇。原來，該「攝影師」有自己的album、網站、facebook，在工作一欄還有寫名自己是XXX studio的「攝影師」。

我對影相不算太有研究，基本功亦未打得好，因此從來都不會說自己是「攝影師」，因為我唔夠班。但當我看「攝影師」為朋友所拍的相片時，很有動感，畫象很豐富，色彩尚可，但點解睇唔撚到我朋友個樣嘅？Oh Sorry，睇唔到可能係你的攝影技巧，專登under。但影人像，睇唔到個人樣，只係睇到個景，咁影來做咩？剪影？唔似喎，我朋友似家明咁，比人食到塊面面目模糊喎。

真係浪費，點解浪費？我朋友靚女來的嘛，係影唔到佢，咁我做咩要睇你自己post上網的「作品」？睇風景，我去現場睇啦。

在數碼相機普及的年代，的確多了「攝影師」，其實人人都鍾意影相呢件事是非常OK的，但有部機就話自己係攝影師的人，就請自便啦。有時唔係話想睇人用咩器材，但「攝影師」幫人影婚紗相之類的重要相片時，就麻煩你拎部好少少的機啦，我的確見過有人拎部400D加一支燈夜晚去幫人影婚紗相。假如你是荒木經維我沒話好說，或者你是米原康正我俾用即影即有添。

係，出來搵食姐。但大佬，人家大事，你都落多少少本錢啦。

最重要其實都係技術。我最撚怕睇完D相，到喉唔到肺，好似有少少感覺，但相中又柒事百出，睇唔到人樣係好多「攝影師」最搞唔掂的一環。大哥，那請你脫下「攝影師」之名吧，自稱業餘玩家是沒問題的。這樣絕對是沾污了我以前老師，我朋友的老公，和我班舊戰友！

聖誕禮物

聖誕節送給朋友的禮物，可以是手錶手機，又可以是自製禮物之類，但我送親禮物比一個朋友，我都唔係送物質野。

有一次佢生日，我就改左兩個花名送比佢，仲要改左兩張圖，將佢最帥氣的相片，key落電影海報。電影包括The Godfather和Captain America。這兩套戲係以唔同的方式講大佬，可想而知我朋友的地位幾咁超然。

今個聖誕，我有好野送比你。

係兩段說話。

第一段

不少同事和朋友，都見過我同你的出現，都問我：「我想問佢幾多歲？」

「咁你估佢幾多歲？」

「我估佢同你差唔多」

「（已有幾百幾粗口問候對方）」

「佢幾後生咁，好似o靚仔玩玩下咁。」

「佢大我八年」

「吓？唔係呀麻！佢大你咁多？我以為你同佢差唔多，最多大你兩年…..」

「係我生得老定係佢生得後生？」

「兩樣都係」

「（再爆不坎入耳的粗口）」

「哈哈哈…」

「的確我自細就比人當我大5歲」

第二段

「CO哥，佢同你同阿光，邊個大D？」

「我最細，佢最大」

「吓？我以為你三個差唔多，阿光仲細過佢？無可能，阿光個樣老過佢咁多。你竟然係最細？！」

「（!@#$#%^&*&^%$#）」

「佢都幾型wo。」

「在我地之間我地成日話佢7」

「唔係呀麻！佢咁都叫7？有樣有身材，筍喎。你又肥，阿光又太瘦，佢外型最吸引」

身不由己

去大陸的大排檔食飯，有街童表演，有妓女企街，有乞丐討飯吃。為了生存，人類乜法寶都有，勁過叮噹的百寶袋。

真係唔公平，如果這班人出生在香港，可能已受緊免費教育，九年也好，十二年也好，總知唔會要搞到要打哂鼓去叫人睇佢倒立，最後只得十元八塊，仲要同姐姐分。

我相信無人會喜歡咁樣的生活，無人想唔識字，無人想接受唔到教育，無奈出生的地方，政府就係無提供這類服務，無錢交學費，就要靠自己的本能去搵錢，搵到錢做咩另一回事，總知就係要錢。

當人家在排隊買蘋果產品時，那些人連買一個蘋果吃的錢都無。

在書城看書，看到一本小說，其中一部份講的是一個舞女，點解要去舞女，因為佢無錢，老豆老母異離，自己一個人去到外省工作，基本知識唔多，想讀書又無錢，呢行好好搵，於是就投身這夜間服務行業搵食。但佢就選擇左唔做張開腿的一種，就像香港民主女神周澄那種賣藝不賣身。如果她要選擇做「脫褲濟貧」那種，錢是多一點，理想是快點達到，但就要用尊嚴去換取。

因於我隨手翻書，沒有細讀中間係咪有張過腿。

結局係，個女仔做左半年，儲夠錢去外國讀書，之後回國工作，沒人再記得她以前的工作，只知道她是一個精通中英日法德語的全能員工，年年獲獎。

我幻想，如果她在香港出生，又會否如此上進？又可能會因為太多好條件，令佢無咁上進。為世所迫才發揮出人類的潛能。但如果用正面的想法去想，就算她在香港只讀band5學校，也可能有機會做到狀元，因為她這類人，最會的未必只係讀書，而係珍惜機會。

爆發潛能

細個練水，教練成日提住一句話和一個故仔，要我地游快D。

要發揮人類的潛能，你就可以游得非常快。

以前有個婦人，抱住個BB過馬路時遇上交通意外，BB比一輪車夾在車底，婦人情急之後一手舉起車子，一手將BB從車底救出來。這就是人類的潛能。

由於在泳池練習，我們的潛能，就只有靠幻想出來的鯊魚，幻想牠在後面追住我，不停游不停游。細個時無諗太多無謂野，點知就真係越游越快。慢慢開始覺得，所有動物都不夠我快的時候，唯有幻想有架船，有架艇之類的死物。

小時候每次阿sir同我講呢個故仔，我都只係會問，咁個BB有無死？個女人係咪玩舉重？之類的on9問題。我最記得一個較好的答案，係個女人之後好累。故仔堅定流我無法驗證，但阿sir呢句話我記足一世仔。

去爆週刊做野時，試過一組人個個有故仔出，我同另一個同事仲要出兩個故仔，那個週末我仲發緊燒。老細講左句：「其實要做都做到嘅」，又真係，潛能嘅野，就係「你點死都要死到出來」。

與同事開會，講起死線deadline，要衝死線其實係做記者一以來要做的事，同食飯屙屎同level，由大學做的小學線，到出來做野的一切文章故仔報導，都有條比食左偉哥更硬的死線。死線未到總會懶懶閑，死線越近，總會迫到一些東西出來，有時更加會係好野。

我成日都諗，做野可以有幾忙，其實真係可以好忙。有時真係一上火，就屎急左兩日都唔屙住，有水飲又唔飲，做埋先，對手離唔開部電腦同埋堆文件，就好似渣左對絕世好波一樣。

就像那女人一樣，發揮完潛能係會有後遺症。通常忙完都會周身「叔叔地」，個肚又脹脹地，口又臭臭地咁。

YES，那就是發揮左潛能了。

兄弟們，我們是時候爆一爆潛能了。

相睇

國內「相睇」電視節目「非誠勿擾」做得空前成功，陀地亞視都有「撻著」，我睇過一兩集，參賽者幾好笑的，班model都唔錯。愛情呢個話題，始終係幾千年都講唔完的火熱話題，情歌一再慘情總有客路。

現實中依然有人相睇，仲要閃婚。有位朋友同大個自己的男朋友拍左十年拖，嫌對方唔夠上進搵唔到又儲唔到錢，於是放棄感情。老豆老母又成日催自己要快點結婚，拍緊拖的日子都帶自己去相睇，頂，搞乜呀，好啦，依家分左手啦，咪再去相睇囉。

對方比自己大八年，算是有點錢，住的地方係河邊，算是中高榴次的小社區。老豆老母係咁催，咪拍拖囉，拍左半年，咪結婚囉；老豆老母想丫嘛，佢地老人家開心咪得囉。

婚後就發現，開始有點後悔，點解咁衝動呢？唉，咪唯有日日出街同唔同朋友食飯，同唔同朋友玩，一星期兩三晚陪老公就算啦，總知有得玩，就一定會出來。唔理著咩衫都好，總知要去玩，番左屋企換衫就出唔番來的啦。

甚麼叫做開心？廿幾歲人仔就已經唔知咩叫開心了，反正結婚一年了，都沒多開心過。跟朋友出去食飯行街，買手機手袋就係開心，同朋友去club飲酒唱K跳舞，咪就係開心。咁廿年之後呢？總不能跳足廿年舞，總不能劈足廿年酒。

又有人好早結婚，三十歲就有個女，不過唔多打理，個個星期落club玩，係男人都攬，係女人都咀，總知就要在bb訓覺的時候出來玩。老公？唔知去左打牌定打波，總知佢有佢玩，我有我蒲。開心咪就係蒲，所有的朋友都可以係來自完全幻想唔到的連繫方式：朋友的朋友，同學的朋友，朋友的同學，facebook，msn，icq，line。LINE都得？係呀，要朋友出來玩，shake下咪有囉。

他們的葬禮

阿渝讀書時，沒有交上女朋友，一直與朋友熱血地過著中學和大學時代。

第一次遇上她，是在朋友的聚會中，一個同學帶她出現。她的身份，是同學的女朋友。她的美，令阿渝住了眼，甚少接近女色的他，面上幾乎露出一副驚惶的的表情：「世上為何有如此漂亮的女生？我的女神啊。」

阿渝相當清楚自己的角色；只有遠觀，沒有褻玩，更沒有想過要與她一起。一直如是者，只靠大夥兒的聚會， 阿渝才有欣賞她的機會。

花沒有因等待而謝了。直至一次， 阿渝知道她傷心了，便與她聊起來。 阿渝開始欣賞的，不再是她那美麗的臉，而是內心的坦白。二人有見面的聊，也有透過電話的聊。而 阿渝傷心的時候，她也會主動安慰他。大家都知道自己在對方心目中的位置，一個comfortable distance。

直至她說要結婚了。

一起哭過的日子，一起為對方打氣的日子，失戀，再戀，再失戀。一時之間， 阿渝覺得，他的知己即將要離開了。「是的，結婚後，我不能再跟你說電話了。你是我一個很重要的朋友，我也捨不得，將來再沒有機會了。」說時，她唉了一口氣。

五年的友誼，也要因結婚而來到終點。 阿渝捨不得的，是二人難得的默契，坦白的告白。淚水沒有像失戀一樣直流整塊臉，只有一滴滴滲入血液中，流遍全身。

婚禮當日，她最美。 阿渝上前祝賀後，說了一聲，再見。二人點頭，「知道了」。

那天是她的婚禮，他們之間的葬禮。

她的剪影

窗外風景不停滾動，田園、山峰、湖泊、農民、雞隻、電線桿。日光打在她的臉上。很曬，也很暖。

小小的雙下巴，鮮紅的珠唇，精緻的五官，只要稍為聚焦，她很美。又稍為將焦點移到窗外，她的輪廓成了剪影，融入了大自然。她的唇，田的草。忽紅，忽綠。

冷空氣在窗外吹著，車箱也被染凍了。中午大陽的熱力，令眼睛不欲睜。外套變得溫暖，呼吸的空氣卻是冷冷的。因為空氣是經過人工製的冷氣機，過濾之後噴出來讓乘客呼吸。耳機在播它想唱的歌，她正睡得甜，窗外剛下過的雨，她都錯過了。

陪我的，有歌，有田園，也有她的剪影。車箱的空氣中，正將我的見光，傳遞到她的臉上。

夜了。田園沒了。只剩下工廠還在開著的燈火，正在趕工的工人。車箱內開了燈，她的剪影也離開了。只剩下清晰的臉龐，並沒有見光死，還是那麼美。眼睛化得有點濃，她轉過頭來，向我報了一個微笑。像花兒般的甜。

冷冰冰的光管射出生硬的燈光，推餐車的服務員一邊賣飲品一邊展露生硬的笑容。乘客不是讀報看書打手機，就是睡覺聊天起東西。電視屏沒有開，唯有自娛。和她說一句，你好。

下站將到，她說要走了，有機會再見。沒有留下聯系，沒有握過手，她卻把剪影留下，給我作一個紀念。

天剛亮，太陽又再溫暖我的外套。

她離開了，但明天又再回來。

她的剪影。

拾回青春

拾回青春，再次熱血，是每個看完青春愛情電影後的觀眾掛在咀邊的口頭禪。但其實做到的人有幾多？尤其在那個喜歡眼超超人家和總會被人家眼超超的香鎮。

青春所指的應該不是年齡，而是行為，而是對行為所付出的勇氣。同一番說話，十多歲時說是童言無忌，三十歲說就要負責任。既想拾回青春，卻總怕被世俗的制約制肘著，青春只能回味。

人人都可以青春，青春唔單止係你敢唔敢做，而係一個行為的形容詞。

十多歲時做的事，廿多歲做又要比人話on9，三十歲做就比人話低能幼稚，四十歲仲做就比人話扮後生。所有事都係人家的comments，他媽的人家的comment，真的那麼重要嗎？

重要。首先大國民要面子。唔型唔緊要，最緊要唔好柒。幾十歲人仲扮青春，仲要放上youtube比人睇，一定係比人屌多過比人讚。而如果你做的事太青春，太童言無忌，身邊已不青春的人都fucking take everything fucking serious的時候，那位扮青春熱血之烈士，身邊的戰友只會越來越少。要再青春的人，一定要有接受批評和白眼之心，甚至不在乎被人唾棄（到底係邊個唾棄邊個都未知）。

睇完戲就胡亂地叫要找回青春的人，只是在懷愐過去，用字好一點罷。說白一點，同你睇完鑑證實錄同埋學警雄心之後，要去做法醫同警察一樣。我睇完神鵰，做埋楊過。

青春的時候，喜歡一個人就簡單地喜歡，只會直接說喜歡和愛之後，然後很快就想到結婚。但不青春地愛，就要看看對方的身家、學歷、有無車有無樓、父母係點、將來條路係咪要捱住行之類。而不少dick head，都喜歡無聲無色地離開、失蹤，連開始都未，就已經離開。從未深愛，已經睇得出對方不可靠，可惜來幹嗎？

我身邊有一個多年的朋友，正在青春地去愛。恭喜你。

扮港客

遇到會講廣東話的內地人，都喜歡認自己做香港人，然後話自己上來做生意。有些死都要扮，有些講講下就話自己在香港有個屋企，其實係大陸人。

要分別佢地係咪香港人，定係有香港身份證的內地人，唔算好難，尤其我呢D有傳媒底的人，只要做過一份要出力求真的工作，要分析一下唔係好難。

場景：party內

「你係邊度人呀，玩到咁顛？」一個戴帽的女人問。

「香港囉。」唔理佢。

「我都係香港wo。」

「唔係呀麻，你係香港人，我乜都得。」

「點解唔可以係香港人。」

「你來呢度做咩？」

「我來做生意囉。」

「女人之家做咩生意咁有型呀？」

「賣英國古董囉。」

「哦。」

「你地唔好當呢度係蘭桂芳咁玩啦。」

「咁你去開邊度玩。」

「beijing。」

「我地頭wo。」基本上bejing係人亂up都up得出。

「呢度d人咁悶嘅，都唔跳舞嘅，我地幾個好似異形咁款囉。」我地幾個麻甩佬自己跳。

「唔係異形…….你地突出姐。」之後比條仔夾走左，幾個麻甩佬繼續扮大陸佬玩。

1.      我印象中港女唔會戴帽去party

2.      港人好少叫「蘭桂坊」，通常叫「老蘭」或「蘭桂」

3.      如果係香港人，一定會話「我都係wo，一齊玩啦」。這是異地常見的事。

4.      如果係香港人，又點會覺得我地突出？唔係應該覺得正常咩？

我估依家多左好多人有一粒星身份證，在香港買左層樓成為新移民，或者去過香港受教育，就自稱係香港人。

就算口音都聽得出的。廣東人說廣東話比港人說廣東話更抑揚頓挫。

何需尋真假

最近寫野的題材越來越認真，越來越悶，悶到我自己都頂唔順。搞乜野上廣州之後，講野文鄒鄒左咁多之餘，連寫野都好悶蛋。咁勁？哲學家？作家？吹水家？

有朋友問我：「喂，其實你寫的野，係咪真嫁，咁好笑，咁勁嘅？」我就好老實咁答：「唔真得哂又唔假得哂。有d誇張位，梗係作得有咁大得咁大。講到天花亂鳳，咁先似我。」其實創作，都係在原有的地方上，不停加入新原素，就係最快達到見標的捷徑啦。

事實上，我從來無講過自己要寫真野，亦從來無講過呢D野係我寫，我更加無話過係寫比人睇。只係我將作品放上自己的facebook，在沒有all right reserved 的情況下，人人都無以為係睇緊我嘅作品，然後問我係真係假的。

已經係一個默認的動作，只要放野上facebook，其實就係代表你自己好想比人睇你諗緊乜，就算篇文唔係自己寫，係轉載，都代表到那個account的主人的心情。

其實扮乜野要爭取私隱，account主人屙屎唔出又放上facebook，自己媾唔媾到女又寫上去比人comment，但出去食飯比人野到相，又話有俏像權有私隱。其實人的私隱，已經cheap過督屎。

就好似，靚女身材好的女人，著少布D想show自己的身材，但比人「裝」又話人偷睇佢，視覺非禮佢。當然，佢著乜有佢的自由，就唔代表人地可以睇。但在facebook做乜做物就好地地自己要寫出來比人知。Physically 比人非禮就唔得，Mentally比人非禮就得。唔單止歡迎，仲要越多越好，越多越讚好。

真的很在意那些是真那些是假的嗎？文中的我就是我嗎？他就是他嗎？你就是你嗎？簡簡單單當睇故事不是更好的嗎？我最喜歡將人家的事放在自己身上寫，因為這樣才夠張力。

大學最有用的一科

大學最有用的一科，是在美國讀過一個印度人教的 Critical Thinking。

半年的課程以來，只有兩個題目要讀。一是科學與神。二是男性與女性。明顯我對「二」是比較有興趣的啦。

胡亂地研究完科學與神的並存，說什麼「如果有big bang，神就不會存在，因為聖經寫是神造天地」之類的題材，自己寫過什麼，都隨著壞掉的硬碟忘記了，反正邊個做天地同我都無關係，只要我唔好破壞佢就無問題。

於是入正題，男人與女人，正到嘔。到底在做愛的時候，是男人嬴定女人嬴？男人通常喜歡在上面，像有征服女人的感覺。男人的dick，從古到今都是權力的象徵，所以所有君皇都有權杖，都有支士的，那支士的，就是dick。古代從來沒有女人君主，就算有武則天，都唔會揸住支士的，因為她沒有dick。

而當男人拎住支dick自以為去征服女人時，其實最可憐的是男人。在整個做愛的過程中，男人可活動的形態比女人要多，所以在整個過程中，男人像在主導床事。但其實男人好Q攰，嘆緊嘅係女人。

以有高潮來計算，女人的高潮一定比男人多，因為男人最多只得三四秒，就是發射那一刻。而男人high的時候，是將最high的東西（即精液）發射出來，但女人的high，是收藏在自己身體內。男人完全唔知女人有幾high，所以成日問女人：「有無高潮？high唔high？」其實男人好慘，成日比女人呃，同時又好妒忌女人，因為女人將high野收收埋埋在體內，自己就射哂出來。

為何男人那麼喜歡做愛？原來係因為男人想找回小時候最舒服的地方，就是未出世時，在老媽子的子宮中。在子宮中，男人可以齋食齋訓，又有水浸住，唔洗做又好溫暖。出世之後又要飲奶，所以成日都想吸吮女性的乳房。因為男人需要母愛。點解女人唔洗？因為女人本身已經有，唔洗搵。

最慘係，做完愛，男人好Q攰，女人因為荷爾蒙關係，客光煥發。

唉，大敗。

張氏情歌

收音機播著陳奕迅的張氏情歌，好多人都話唔知up乜，我睇埋mv（我有呢種習慣），覺得好正。導演係杜汶澤，有一幕係個著住中學校服的男主角，在樓梯將手伸入同樣著住中學校服的女主角裙底。

好香港新一代的慣性。年長一點的人睇完會覺得偎鎖，我覺得正反映社會現實。

以前我中學時代追女仔，很簡單以為買下野tum下對方就會開心，邊度識咩細心、買早餐、織頸巾等（以前我男校，係差少少）。下午飯可以唔食，或者只係食一個麵包，然後打波打足一個lunch time，就係為了儲起那剩下的寧用錢去買禮物。

依家細路要錢好易，iPhone iPad係生活必需品，屋企可以無泳褲，但唔可以無機打。對住要追嘅女仔，已經唔再係買隻熊啤啤，而係直接買避孕套（甚至唔買，留番D錢爆房）。

中間的浪漫可以skip哂，這就是快餐年代的極速主義。聽過一個歪理：男人做咁撚多野，最終都係為左扑野。好簡單，做咁多野都係為左要型要有地位要有自我風格，咁做為乜？就係媾女。媾女為乜？咪為左扑野。這年代那麼多的強姦案、幾P案之類，其實仲有大把，只係好多無報警。

而喜歡極速的人其實又極矛盾地迫自己要嘆慢版，例如，媾女總要帶對方到高級餐廳食牛排、嘆紅酒，將自己最撚有品味的一面盡情表現。要有品味就要識慢慢嘆，但其實心裡要卻好想快D上房執兩劑。頂你，o岩o岩食完牛排，人地上哂火嘛。

喂，有無問下個女仔，食唔食牛呀？

男人真係條野行先。無計，扯旗之後的確係龜頭行先過人頭。

開放

臨上來做野之前，身邊不少朋友舊同事都叮囑我，女同胞好開放，亦好有手段，唔好過左三個月番來同我講你結左婚。

女性朋友的上鎮女友人穿得相當性感，女性朋友問上鎮女：「你咁露，咪比人睇蝕哂？」年約廿多的上鎮女是豐滿的，認為現時是黃金年齡，有得露就趁依家露。「只能看，不能碰。」上鎮女一邊抖動眉角一邊說。

一說到開放，總是令人聯想到濫交、性的開放。而我所遇到的大陸男、女朋友，都很開放，是對認識朋友的開放。加入新公司，不少男女同胞都會主動認識，午餐叫飯會問你食咩，有下午茶會預埋你，而非像香港的辦公室，只有三道冷漠的partition。

有幾個同事，打了幾次招呼，大家都是後生仔女（我知我已經唔算係），問我平日去邊度蒲，去開咩地方玩。我說我未熟當地，每日只是上班下班，去書店走走。他們便主動說日後帶我去酒吧玩，一起劈酒。我以為他們的意思，是兩三個同事放工後去Happy Hour，但原來廣市唔興。

「做咩要兩三個人去飲酒？」同事反問。

「唔係幾多個人去？」我。

「我地興一大班人去，包張台，十幾人啦。有時會同隔離台的人玩，咪又係『我同朋友玩遊戲，輸左，要問你拎電話』之類的開場白搭訕，然後兩三張台一齊玩。」

當然，我也聽過不少真的在性方面開放的同胞。事實上我也不知是否算是慶幸，我沒有遇過。我遇過的開放同胞，是一群開放接受和認識新朋友的人。

牛牛

閒走鹿頸，冬日的正午在香港僅餘的背山面海之地，與陽光玩遊戲。一路上有不少車隊、單車隊、電單車隊等沿鹿頸走新浪潭路，而我則沿沙頭角海的小山逛逛。

沿路走是一大片海景，遠處是香港及深圳的沙頭角，再過便是鹽田港。海岸邊有不少水中植物，在市區的海岸邊幾乎找不到。

鹿頸遊客大多是老人家或一家大細，後生仔女甚少，可能後生仔女喜歡行浪茄、南生圍等。而我最期待的，是途中的山水豆腐花。可惜去到阿姐話今日無整，無得食。果然夠型，唔整就唔整，話知你星期日。

該檔出名食雞食菜食豆腐花，行到餓，唯有坐下食野。叫了一盤黃酒雞、砵仔上的蠔仔蒸蛋和紅菜芯。雞肯定是走地，因為皮下無脂肪，肉質爽口，唔「鞋」，黃酒夾薑味，雞肉無醃，有少少鮮味。用作蒸蛋的蠔仔入口「標」出一陣鮮甜的汁，配合蒸蛋內，師傅巧妙地加入薑粒和蔥粒，令蒸蛋入口時一陣陣香氣。最正的是，薑粒入口之際，是不用咬但能感到薑味的，可見師傅將薑切得極細。

紅菜芯油多了一點，但由於是自己在後欄種的（我見到菜田，就左我右方），所以是難得有菜味和有植物的香甜味（基本上現在吃什麼都無味的）。

最開心係見到個老闆的囡囡，就來四歲，好活潑，跳跳扎，同隻牛同幾隻狗玩，通山走，是鄉村小童的自在與樂趣。妹妹住在沙頭角，星期六日無坐在家中玩電腦玩ipad，而係坐船去鹿頸陪家人開檔，收錢，找錢。如果是一個在市區居住、名校林立的地方長大的小孩，她可能在學芭蕾舞、彈鋼琴、玩play group，因為父母已為佢安排好，要在社會上有競爭力，入名校，將來前途無限。

小朋友，你有無見過真嘅牛牛？

文化大國之大國文化

在書城走走，七層塔般的書城，由地面打上頂層，一日都嫌唔夠。

想找的作者屬哪個類別卻不知道。幸好貼心地有部查書終端機，輸入書名或作者，就有書本的位置，儼如香鎮最大公共圖書館一樣。

走入書城地面層，右邊是一堆悶旦的心理學翻譯書、大國哲學書等，大國的哲學，不敢恭維。左側有古代的線裝書，也有新潮的電子產品，電腦和手機之類的，新舊融和，此例最佳。

大門正中是暢銷作者和暢銷書籍的展覽廳，一個個作者的簡介、作品、風格等，都印在一塊塊大板上，板前像供奉他們一樣放著他們的作品。對於我這種對大國文化未有所識的小子來說，絕對是極佳的入場簡介。

看罷我衝上三樓。在終端機上顯示作家韓寒的作品放在三樓，於是想也不想，胡地亂攨。韓寒的作品是有文化地無厘頭之餘，又同時能諷刺大國政府的多此一舉。始終是大國人，用字比較文鄒鄒，是學不來的。

然後找自己祖先的書，周瑜。果然有一本，唯一一本只講周瑜的書，還有張飛、關公等。二話不說，極速放入購物籃。

大國文化之為文化大國，因大國有將文化數字化之能。廣市每人每月必看一套電影、一套戲劇等之類，將之剩以千萬人口，廣市就此成為文化第一之城。七十二烈士也沒有白流革命之血。

但坦白說，過去一個月看書速度慢，寫作速度也減了，是冬天，雙手與鍵盤作對，還是腦子要冬眠，有稿題，有創作之意，沒寫作之力？

開放

臨上來做野之前，身邊不少朋友舊同事都叮囑我，女同胞好開放，亦好有手段，唔好過左三個月番來同我講你結左婚。

女性朋友的上鎮女友人穿得相當性感，女性朋友問上鎮女：「你咁露，咪比人睇蝕哂？」年約廿多的上鎮女是豐滿的，認為現時是黃金年齡，有得露就趁依家露。「只能看，不能碰。」上鎮女一邊抖動眉角一邊說。

一說到開放，總是令人聯想到濫交、性的開放。而我所遇到的大陸男、女朋友，都很開放，是對認識朋友的開放。加入新公司，不少男女同胞都會主動認識，午餐叫飯會問你食咩，有下午茶會預埋你，而非像香港的辦公室，只有三道冷漠的partition。

有幾個同事，打了幾次招呼，大家都是後生仔女（我知我已經唔算係），問我平日去邊度蒲，去開咩地方玩。我說我未熟當地，每日只是上班下班，去書店走走。他們便主動說日後帶我去酒吧玩，一起劈酒。我以為他們的意思，是兩三個同事放工後去Happy Hour，但原來廣市唔興。

「做咩要兩三個人去飲酒？」同事反問。

「唔係幾多個人去？」我。

「我地興一大班人去，包張台，十幾人啦。有時會同隔離台的人玩，咪又係『我同朋友玩遊戲，輸左，要問你拎電話』之類的開場白搭訕，然後兩三張台一齊玩。」

當然，我也聽過不少真的在性方面開放的同胞。事實上我也不知是否算是慶幸，我沒有遇過。我遇過的開放同胞，是一群開放接受和認識新朋友的人。

一句到尾。

喜歡一個人，呆呆出神的，咀唇輕輕貼著，想昨天的事，今天的事，和明天的事。

如果沒有時間發白日夢，人類只會是一部機器，沒有靈魂的活死物。

為錢工作，寧作機器者，多不勝數。

生活充滿剛好的安排，不會有無謂的垃圾時間，剛好的，充實的，悶悶的。

Scheduled life，Scheduled to die。問蘇師傅最熟。各安天命。

很多事存灰色地帶，卻總有人熱衷貨源歸邊。

香鎮的人說大國民如何差如何沒文化，香鎮人也不過是笑面虎，憑甚麼評論人。

可惜香鎮不少喜歡認屎認屁的人，在A區輸掉的，在B區一定要贏。

香鎮製造的鎮女，名聲響喻全球，拜金乃其中一門手藝，若不拜金，何來有金融中心？

與其眼紅人家拎LV袋，不如自己努力買下整家LVMH。

正如朗拿度，傷左之後全世界都話佢光輝不再，點知練埋左腳，世界最強雙槍王。

但總有二世祖，喜歡用物質換取朋友，當然亦有不少牛鬼蛇神喜歡依附。

現實世界就是，金錢就是最吸引人到場的力量，免費也是金錢，因為錢是人家出的。

只要肯定自己無走錯路，就算身邊所有人都指鹿為馬，也不要隨波逐流。

朋友是沒有永遠的，只有分階段相熟，然後生疏，又或者再熟。正如經濟循環，有升有跌。

六十八歲的他，十八相熟的朋友不剩一個。

香鎮有賴幾萬位政府俠士的安份守己，令交了四十多年稅的他，每個月只有生果金。

又或者從事刻板工作的專業人士，成為專業後，財源滾滾，逢女必媾到，有車又有樓。

想做份好工，賺好多錢，做自己鍾意的事，買自己鍾意的東西，即平民化奢侈品。

如果我生於油田，我肯定是卡達菲和拉登的大佬。

最討厭裝有深度的批評。那些是自以為不是自以為是的傲慢者。