乳鴿大王

與中學同學聚舊，大家都說起自己的女朋友、舊女朋友的下落，和與妻子的新婚生活等。其中有一位是少女愛好者，儘管他本人是每年都會生日，但女朋友們就好像不會生日一樣。印象中在他的拍拖歷史當中，未試過有一個女朋友過20歲。

「喂，你女朋友點呀」

「幾好丫，拿，你睇下邊個靚D」原來佢女朋友兼職做model，最近上了mina，當然爭取機會在我們面前炫耀一番。

「右邊果個。」

「仆街你睇真D！拿下一張呢」

「左邊果個」（兩張我揀的都唔係佢女朋友）

「頂你，果隻豬來的，梗係另一個靚D啦，上mina呀……無，玩下姐，做咩model丫。」咀角卻微微向上翹，一副食相出哂面。

「哦，咁佢最近點？」我問

「考Alevel呀，好少見。」

仆街，我已經廿九幾年沒聽過Alevel這個字，簡直係…入大學，出來工作前後七、八年，現在竟然聽到有同齡的朋友的女朋友要考Alevel，聽完真係有點毛管桐。香港最後一批Alevel考生啊。

這位朋友的確是經典中的經典，人家余文樂在戲中就話自中四沒長大過，但我這朋友是揀來揀去都係中四中五的女生做女朋友，我覺得有點變態，其實我真的不太會與年紀太小的人溝通。大家接觸的事物不同，層次不同，思想成熟度又不同。

但其實這些都是其次，主要是我朋友只揀乳鴿。可能是我內心心處妒忌，溝來溝去都只是同齡的吧。但，坦白講，真係有點變態呢。

雖然我從來都不在意女朋友的年齡，但我不會刻意揀乳鴿，只要合得來，傾得掂就OK。溝通不來的，說什麼都嘥9氣。

春嬌與志明回憶

彭浩翔是我最喜愛的導演之一，他的作品我每部都睇過，而且每套都有正版DVD做珍藏，因為，在不同年紀看他的電影，有不同的感覺。

最近最hit的一定係春嬌與志明。這套續集與首集幾乎沒有什麼大關係，所以不能比較哪一集較好看，麻木的我只會說，兩集都好看。

戲中很多金句，也有很多集體回憶，有的令人會心微笑；也有的令人捧腹大笑。我也很難選最深刻的一句，但有一幕來得平凡，卻勾起我無數回憶。

志明對優優說：「我唔想每次分手都拖泥帶水，無處理好就完結。」

這一幕是志明長大的轉捩點。

我拍拖每次都比人飛（係呢，真係睇唔出呢，班仆街唔識貨姐），幾乎每次都無原因，無處理好就分手，次次都好令我莫名其妙，可能對方也莫名其妙吧。在沒有第三者的情況下分手，有時真係好難有原因，係唔鍾意就唔鍾意，係覺得去唔到就去唔到，「無謂嘥大家時間」。

嗱，其實我好撚憎「無謂嘥大家時間」呢句，講到一段感情是應該很有目標和目的才能進行一樣。就算那一刻很果斷地分開了，雙方會否因此而覺得，「嘩，我賺撚左兩日呀，幾叻！」？當然唔會。所以，呢句唔成立。

其實分手原因很簡單，就係鍾意同唔鍾意，唔鍾意就分開，唔拖泥帶水，唔洗藉口，咩「你無做我老公的條件」，嘥九氣，唔洗講。

等於我要由nokia轉用iphone，張sim卡話轉去另一部機就轉，唔會無啦啦，插下nokia，又插下iphone。用用下iphone，唔捨得部nokia，都只係會好好地放在櫃內，而唔會無啦啦拎出來用兩日。

因此，志明這一幕，其實內容很簡單，就係「我鍾意佢多D，我忘記唔到佢，我唔想一腳踏兩船。」分手分得有承擔，所以志明絕對唔仆街。